رجاء الجداو ي الجانب الخفي من حياتها

#رجاء_الجداوي_هانم
 كانت مع منى الشاذلي وبتحكيلها وبتقولها : أنا قبل ما أشتغل وربنا يكرمني مكنش عندي إلا طقم واحد بس كل يوم بغسله وألبسه وألفت مقولة إن الموظف مينفعش يلبس إلا طقم واحد عشان كده .. عشان معنديش لبس

وكملت وعنيها فيها دموع : جزمتي لما إتقطعت قعدت 3 شهور رابطة رجلي على الجزمة كأن رجلي واجعاني عشان مكنش عندي فلوس أجيب جزمة .. الجزمة في الوقت ده كانت ب99 قرش عند كايزك في شارع فؤاد .. تديله جنيه يديكي قرش ساغ .. وأنا مكنش معايا ده
لما بقى معايا فلوس وإشتغلت بقوا يبصوا عليا ويقولوا شوفوا جميلة وأنيقة .. أضحك وأفتكر الجزمة .. عشان كده بقول أي إنسان يمر بظرف صعب لازم مينسهوش أبدا ..عشان دايما يحس بالآخر .. دايما يحس باللي بيعاني .. لكن لو نسي هيبقى على رأي المثل " خافي من المصدي لو الزمن سنفره لأنه هيفضل مصدي برضه "

ماتت الجميلة الست رجاء الجداوي .. ماتت أم ضحكة بريئة وملامح هادية .. فيه جانب مش كتير يعرفه في رجاء الجداوي .. الست دي كانت خيرة بشكل غير طبيعي .. شاركت حتى قبل مرضها بأيام في أعمال خيرية لا حصر لها .. لما إتسألت قريب رمضان بالنسبالك إيه قالت : إني أشوف في عيون الناس الفرحة وانا بوزع شنط رمضان أو وجبات الفطار وأسمع كلمة شكرا عشان أعرف أنام وانا مرتاحة

ودعت كل الناس إنها تتصدق ولو بوجبة .. وجبة واحدة كفيلة تدخلك الجنة .. وقالت كلمتها الشهيرة : لما تجوع فكر في إنسان تاني جعان

رجاء الجداوي كانت أكبر داعمة لمستشفيات السرطان في مصر ولمرضى السرطان .. وآخر زيارات ليها قبل وفاتها كانت مستشفى علاج الأورام بالأقصر ومستشفى أيادي المستقبل للسرطان بإسكندرية و 57357 و مستشفى دكتور مجدي يعقوب لمرضى القلب كمان .. غير التبرعات كانت بتقعد مع المرضى والأطفال وتسليهم وتضحكهم وتدعيلهم بالشفا وتبقى جنبهم وتدعمهم معنويا

ده غير دعمها للأيتام والارامل والغارمات في كل أنحاء مصر .. وفي أزمة كورونا لما أتمنعت الموائد في مصر صممت إنها هتعملها بس بشكل تاني وعملت أضعاف اللي كانت متعودة تعمله في كل مائدة كل سنة ووزعته على الناس في الشوارع .. وكانت بتنزل توزع كمامات ومطهرات وفلوس واكل ومواد غذائية ولبس وكانت بتقول : إلا الجوع والغطا .. الناس تشبع ومتنامش من غير عشا الأول وتستر نفسها الأول وبعد كده يحلها ربنا من عنده

من طيبة الست رجاء .. جالها زمان من أكتر من ٤٥ سنة طفلة عندها ١٥ سنة .. راحتلها لحد البيت وهي معاها مجلة عليها صورة رجاء الجداوي .. خبطت على الباب وفتحتلها رجاء .. قالتلها والنبي يا ستي أنا جايالك من المنوفية وأنا بحبك وعايز أشتغل عندك هنا وأعيش معاكي

المفاجأة ان البنت دي قعدت مع رجاء الجداوي لمدة ٤٥ سنة .. من طفلة عندها ١٥ سنة لحد ما بقى عندها ٦٠ سنة .. وبقت مديرة البيت وبنتها وصاحبتها .. وبقت زي ظلها .. وعاشت أجمل أيام حياتها في بيت رجاء الجداوي اللي مرضيتش تردها ولا تكسفها .. ولا تكسر بخاطرها

الله يرحمك يا ست رجاء هانم ❤️
#شهيدة_الوباء💔