رواية لن أعود

بقلم : هيام إمام
*وعايزنا نرجع زي زمان قول للزمان ارجع ي زمان* ❤
رفعت عيني و بصيت في عينيها و ركزت ، أول مرة ماترتبكش و تبعد عينيها عني ، أول مرة ماتقوليش هتفضل باصص كده كتير مش هاعرف أتكلم معاك و تضحك و تتكسف و ألاقي خدودها احمرت ف اعاكسها و تتكسف أكتر و تزعل زي الأطفال ف اصالحها ، فيه حاجة كبيرة اتغيرت جواها ، شايف في عينيها كلام كتير ملخبط و وجع اتوجعته بسببي و مش عارفة تبدأ منين ، محتاج أكسر الصمت بيننا و أسمعها أو يمكن هي اللي محتاجة تسمعني ، اتكلمت بصوت هادي و سألتها ..

-" تحبي تشربي إيه ؟ " 

_" مش عاوزة شكرًا " 

-" متأكدة ؟ "

_ " ايوة "

-" عاملة إيه ، طمنيني عليكي ؟ "

بصتلي دقيقة و ابتسمت و قالتلي ..

_" لسه زي م أنت يا حسن ، بس أحنا مش نازلين نتقابل النهاردة علشان تسألني عاملة إيه ، أحنا هنكون فاشلين اوي لو دار بينا الحوار بالشكل ده " 

-" عندك حق .. طيب اتكلمي أنا سامعك ، أنا عارف أنك جاية النهاردة علشان تسمعيني أكتر ، بس صدقيني أول م شوفتك كل كلامي اختفى و كل حروفي هربت مني ، أعتقد أي محاولة مني للكلام دلوقتي هتبوظ الدنيا و تعقدها مش هتصلح حاجة "

_" لأ لحظة ، أنا منزلتش النهاردة علشان أصلح موقف يا حسن ، أحنا مش متخانقين سوا و جايين نتراضى ، أنا وافقت أقابلك علشان أقفل صفحة قديمة و أتخطاها ، أنا و أنت ماينفعش نحاول تاني نرجع و لا هاينفع نكون صُحاب لأننا م البداية مكناش صُحاب ..
عارف يا حسن ..
فيه جملة حلوة أوي قرأتها بتقول *لو عُرضت الأقدار على الأنسان لـ اختار القدر اللي اختاره الله له* 💙
احنا اللي بنحب نقاوح و نتعب نفسنا ، م الأول ربنا بيبعت لنا إشارات و علامات تبين لنا إذا كُنا ماشيين صح و لأ ، بس أحنا مابناخدش بالنا ، أو بناخد بالنا و بنعمل نفسنا مش شايفين ، مابنفهمش إلا متأخر ، أحنا اللي بنحب نغامر و نوجع قلوبنا ، أنا اللي كنت غبية ولاغية عقلي و ماشية معاك ، كان كل اللي حوالينا شايفين الحقيقة و بيقولولي و بينبهوني و ينصحوني كمان بس أحنا الحب بيعمينا يا حسن ، ثقتي فيك المُفرطة هي اللي وصلتني لكل ده ، وأنا كُنت كفيفة معاك و ياريتك قدرت .. " 

بصيت ليها و حسيت بوجع الدنيا كله في قلبي ، شوفت دمعتها اللي نزلت منها و حاولت تمسحها بسرعة علشان ماخدش بالي ، فهمت قد إيه أنا طلعت وحش اوي معاها و في نظرها ، فهمت أن فعلًا خسرتها بغبائي و ندمت ، فضلت ساكت دقيقة و باصص ليها ، عينيها مستنية مني رد و أنا مش عارف أقولها إيه فـ قولتلها ..

-" أنا آسف .. " 

_" بس كده ؟! " 

-" أنا آسف فعلًا ماعنديش أي كلمة قادر أقولها ، مش لاقي كلام أرد بيه عليكي ، مش لاقي كلمة تطيب واجعك مني أو تغفرلي عندك .. 
سامحيني و أنا آسف على كل اللي سببتهولك يا سارة ، آسف أن ضيعتك مني بغبائي " 

_" بالبساطة دي ؟ .. 
هو أنت رجعت تاني ليه ؟! حاولت توصلي و كلمتني ليه ؟ قولت أننا ننزل
 و نتقابل ليه ؟
علشان تقولي آسف بس ! 
طيب أنت آسف على إيه بالظبط ؟!
آسف على خيانتك ليا اللي لحد دلوقتي أنا مش مستوعبة أنك تعمل فيا كده ولا فاهمة أنا قصرت معاك ف إيه علشان روحت دورت أو لقيته في حد غيري ، طب لما أنا قصرت معاك ليه ماقولتليش ليه محاولتش تلفت انتباهي بأي طريقة أن ناقصك حاجة طيب على الأقل كُنت حاول معايا ولو لقيتني مقصرة لسه سيبني بس ليه اخترت توجعني كده ! و ماتقوليش ماختارتش محدش مننا بيعمل حاجة غصب عنه و محدش أجبرك على كده برضه ، أنا عملت لك إيه وحش أو وجعتك ف إيه علشان تردهالي بالشكل ده و أنا عمري م هسامحك على ده يا حسن ، ولا أنت آسف على قلة تقديرك ليا ولا آسف على الوجع اللي انا عايشة فيه بسببك بقالي سنين و مش عارفة أخرج منه ولا آسف على أنك خلتني مابقتش عارفة أثق في أي حد تاني من بعدك ولا آسف على قلبي اللي أنت كسرته و كل ذنبه أنه حبك و أتعلق بيك ، أنه شافك أحسن حد في الدنيا رغم عيوبك اللي كنت بعمل نفسي مش واخدة بالي منها ، ولا روحي اللي طفيتها بالتدريج و ضحكتي اللي بقت بهتانة بسببك برضه ولا إيه ولا إيه يا حسن ، أنت لو فضلت تتأسف عمرك كله مش هتمحي اللي حسيته بسببك ولا هتهون حاجة ، ياريتك ما رجعت ولا اتقابلنا من تاني "

-" كفاية يا سارة ، طب قوليلي أعملك إيه يرضيكي "

_" أمشي يا حسن و أنساني ، ماتحاولش تصحي أي حاجة من الماضي تاني علشان هتفشل ، سيبه زي م هو و سيبني اتعافى من حُبك و وجعك لوحدي و ماتقلقش هاييجي اليوم اللي هسامحك فيه بس وقتها مش هاتبقى فارق معايا أو وقتها مش هفتكر أن كان فيه حد في حياتي اسمه حسن و صدقني أنا مش ندمانة على أي حاجة حصلت بالعكس أنا بحمد ربنا طول الوقت و اتعلمت درس مهم جدًا في حياتي يمكن من غيره ماكنتش هوصل لأي نجاح وصلتله دلوقتي .. عن اذنك " 

#هيام_إمام
#Semi_Writer 💙